டார்க் பேண்டஸி சுவிஸ் ரோல் டூ ஃப்ரூட் கேக் வரை... குழந்தைகள் தினத்தில் அரசுப் பள்ளி மாணவர்களுக்கு கேக்; வெளியான அரசாணை!

13

நவ.14 அன்று குழந்தைகள் தினத்தைக் கொண்டாடும் வகையில், தமிழ்நாடு முழுவதும் உள்ள அரசு மற்றும் அரசு உதவி பெறும் பள்ளி மாணவர்களுக்குக் கேக் வழங்கும் திட்டத்திற்கான அதிகாரப்பூர்வ அரசாணையைத் தமிழக அரசு வெளியிட்டுள்ளது. மாநில அரசு குழந்தைகள் தினத்தை அனைவருடனும் இணைந்து ஒரு கூட்டு விழாவாக முன்னெடுப்பது இதுவே முதல் முறை என்று மூத்த அரசு அதிகாரி ஒருவர் தெரிவித்துள்ளார். பள்ளி மாணவர்களுக்கு கேக் வழங்கும் திட்டத்திற்காக முதற்கட்டமாக ரூ.9.27 கோடி நிதி ஒதுக்கீடு செய்யப்பட்டு டெண்டர் கோரப்பட்டிருந்தது.

தற்போது வெளியிடப்பட்டுள்ள அரசாணையின்படி, ஸ்பாஞ்ச் ரக கேக் துண்டுகளை (Sponge-style slice cakes) வழங்குவதற்கு 4 முன்னணி நிறுவனங்களுக்கு ஏற்பு கடிதங்கள் (Letters of Acceptance - LoAs) வழங்கப்பட்டு பணி ஆணை பிறப்பிக்கப்பட்டுள்ளது. அவை, பிரிட்டானியா இண்டஸ்ட்ரீஸ் (Britannia Industries), ஐடிசி லிமிடெட் (ITC Ltd), எலைட் நேச்சுரல் பிரைவேட் லிமிடெட் (Elite Natural Pvt Ltd), ட்ரீம் பேக் பிரைவேட் லிமிடெட் (Dream Bake Pvt Ltd) இந்த 4 நிறுவனங்களிடமிருந்து மொத்தம் 62 லட்சத்து 46 ஆயிரத்து 412 கேக் துண்டுகள் ரூ.7.54 கோடி மதிப்பீட்டில் கொள்முதல் செய்யப்படுவதாக அரசு அறிவித்துள்ளது.

23

பழங்கள் (Fruit), வெண்ணிலா (Vanilla) மற்றும் சாக்லேட் (Chocolate) உள்ளிட்ட பல்வேறு சுவைகளில் இந்த கேக்குகள் மாணவர்களுக்கு விநியோகிக்கப்பட உள்ளன. மேலும் மாணவர்களுக்குப் பிடித்தமான வகையில் வெரைட்டியைச் சேர்க்கும் விதமாக, சன்பீஸ்ட் டார்க் பேண்டஸி சுவிஸ் ரோல் சாக்லேட்டுகளும் (Sunfeast Dark Fantasy Swiss Roll Chocolates) இந்தத் தேர்வில் சேர்க்கப்பட்டுள்ளன.

அரசு மற்றும் அரசு உதவி பெறும் பள்ளிகளில் உள்ள ஒவ்வொரு மாணவரும், ஆசிரியர்கள் மற்றும் பள்ளிப் பணியாளர்களுடன் இணைந்து குழந்தைகள் தினத்தை ஒரு கூட்டு விழாவாகக் கொண்டாடுவதை உறுதி செய்வதே இந்த முன்னெடுப்பின் நோக்கமாகும் என்று அதிகாரி ஒருவர் தெரிவித்துள்ளார். மேலும், "அரசின் இந்த சிறிய முயற்சி குழந்தைகள் பள்ளியுடன் கொண்டுள்ள பிணைப்பை வலுப்படுத்தும் என்றும், அவர்களின் பள்ளி வருகையை (வருகைப் பதிவு) ஊக்குவிக்கும் என்றும் நம்புகிறோம்" என்றும் அவர் குறிப்பிட்டார்.

33

இந்நிலையில், பள்ளி மாணவர்களுக்கு வழங்கப்பட உள்ள கேக் சந்தை விலையை விட கூடுதல் விலைக்கு வாங்கப்படுவதாக சமூக வலைதளங்களில் காணொலிகளுடன் தகவல்கள் பரவி வந்தன. இதற்கு தமிழ்நாடு அரசின் தகவல் நம்பகத்தன்மை பிரிவு (Fact Check Unit) விளக்கம் அளித்து செய்திக்குறிப்பு வெளியிட்டுள்ளது. அதில், பள்ளி மாணவர்களுக்கு வழங்கப்பட உள்ள கேக் மார்க்கெட் விலையை விடக் கூடுதல் விலைக்கு வாங்கப்படுகிறது.

குழந்தைகள் தினத்தை முன்னிட்டு தமிழ்நாடு அரசு மற்றும் அரசு உதவி பெறும் பள்ளி மாணவர்களுக்கு வழங்கப்படவுள்ள 45 கிராம் எடையுள்ள ஒரு பிரிட்டானியா கேக் ரூ.12.15-க்கு (Excluding GST) கொள்முதல் செய்யப்படவுள்ளது. சமூக வலைதள வீடியோவில் 33 கிராம் கேக் ரூ.15-க்கு மார்க்கெட் விலையில் விற்பனை செய்யப்படுவதாகக் குறிப்பிடப்பட்டுள்ள நிலையில், மார்க்கெட் விலையை விட கூடுதல் விலைக்கு கேக் கொள்முதல் செய்யப்படுவதாகப் பரப்பப்படும் தகவல் முற்றிலும் தவறானது மற்றும் உண்மைக்கு மாறானது என்று அதில் தெளிவுபடுத்தப்பட்டுள்ளது.