கோவை: அக். 31-
கோவை மத்திய சிறையில் இருந்து விசாரணைக் கைதி தப்பியோடிய சம்பவம் தொடர்பாக, ரேஸ்கோர்ஸ் போலீஸார் விசாரித்து வருகின்றனர்.
கோவை மத்திய சிறையில் விசாரணை கைதிகள், தண்டனைக் கைதிகள், உயர் பாதுகாப்புப் பிரிவு கைதிகள், குண்டர் தடுப்புக் கைதிகள் என 1,600-க்கும் மேற்பட்டோர் அடைக்கப்பட்டுள்ளனர்.
கோவை மத்திய சிறையில் விசாரணைக் கைதியாக அடைக்கப்பட்டிருந்த ராகவன்(25) என்ற கைதி மீது கர்நாடக மாநிலம் பெங்களூரு உள்ளிட்ட இடங்களில் பல்வேறு வழிப்பறி வழக்குகள் உள்ளன. தொடர்ந்து கர்நாடக மாநிலத்தில் உள்ள வழக்கு விசாரணைக்காக கடந்த ஜூன் மாதம் ராகவன் கோவை மத்திய சிறையில் இருந்து கர்நாடக போலீஸாரால் அழைத்துச் செல்லப்பட்டார். விசாரணை முடிந்து கோவை திரும்பும் வழியில் அன்னூர் காவல் நிலைய எல்லைக்கு உட்பட்ட பகுதியில் இருந்து ராகவன் தப்பி ஓடினார்.
இதனையடுத்து கர்நாடக மாநில போலீஸார் அளித்த புகாரின் அடிப்படையில் அன்னூர் போலீஸார் ராகவனை தேடி வந்தனர். இந்நிலையில் பவானி சாகர் பகுதியில் ராகவன் தலைமறைவாக இருப்பது அன்னூர் போலீஸாருக்கு தெரிய வந்தது. இதனைத் தொடர்ந்து அங்கு சென்ற அன்னூர் போலீஸார் ராகவனை கைது செய்தனர். பின்னர் அவரை கோவை மத்திய சிறையில் அடைக்க நேற்று நள்ளிரவு அழைத்து வந்தனர்.
தொடர்ந்து இரவு 11.30 மணிக்கு கைதி ராகவனை, அன்னூர் போலீஸார் கோவை மத்திய சிறைக்கு அழைத்து வந்தனர். சிறை வளாகத்தில் நுழைந்தவுடன், உள்ளே கைதிகளை விசாரிக்கும் அறை அருகே, விசாரணைக் கைதி ராகவன் கையில் இருந்த கை விலங்கை போலீஸார் கழட்டினர். அதன் பின்னர், கைதி ராகவன் போலீஸாரை போக்கு காட்டி ஏமாற்றிவிட்டு, சிறை வளாகத்தில் இருந்து வெளியே ஓடி தப்பிச் சென்றார்.
அங்கிருந்த போலீஸார் மற்றும் சிறைக் காவலர்கள் அவரை பிடிக்கமுயன்றும் முடியவில்லை. அதற்குள் அவர் தப்பிச் சென்றார். தொடர்ந்து இச்சம்பவம் தொடர்பாக சிறைத்துறை டிஐஜி, சிறைக் கண்காணிப்பாளருக்கு தகவல் தெரிவிக்கப்பட்டது. மேலும், கோவை ரேஸ்கோர்ஸ் போலீஸாரிடம் புகார் அளிக்கப்பட்டுள்ளது. அவர்கள் தப்பியோடிய கைதியை தேடி வருகின்றனர். முன்னரே தப்பியோடி கைதி பிடிபட்டு மீண்டும் தப்பியோடிய சம்பவம் பரபரப்பை ஏற்படுத்தியுள்ளது.
ஏற்கனவே தேனி சிறையில் இருந்து 17 கைதிகள் தப்பி ஓடி அவர்கள் கைது செய்யப்பட்டுள்ள நிலையில் மீண்டும் கோவை சிறையில் இருந்து ஒரு விசாரணை கைதி தப்பி ஓடி இருப்பது தமிழகத்தில் சட்டம் ஒழுங்கு இருக்கிறதா இல்லையா என்ற கேள்வியை எழுப்புவதாக எதிர்க்கட்சிகள் கடமையாக விமர்சனம் செய்து உள்ளன