Bigg Boss 10 : அக்‌ஷிதா கிரேட் எஸ்கேப்... பிக் பாஸில் இந்த வாரம் எலிமினேட் ஆகப்போகும் போட்டியாளர் யார் தெரியுமா?

15

25

பிக் பாஸ் வீட்டில் ஏற்கெனவே TTF வாசனுக்கும் முகேஷுக்கும் இடையே ஏற்பட்ட தள்ளுமுள்ளு சம்பவம் சர்ச்சையை ஏற்படுத்தியிருந்தது. அந்தப் பிரச்சனை ஓரளவுக்குத் தணிந்த நிலையில், தற்போது அக்ஷிதாவுடன் வாசனுக்கு ஏற்பட்டுள்ள மோதல் மீண்டும் பரபரப்பைக் கிளப்பியுள்ளது. சமீபத்தில் நடைபெற்ற ஒரு சம்பவத்தின்போது, அக்ஷிதாவின் கை வாசன் மீது பட்டதாகக் கூறப்படுகிறது. இது தொடர்பான வீடியோ காட்சிகள் சமூக வலைதளங்களில் பரவிய நிலையில், அக்ஷிதா வேண்டுமென்றே வாசனைத் தாக்கினாரா என்ற கேள்வி ரசிகர்கள் மத்தியில் எழுந்துள்ளது.

ஆனால், தான் திட்டமிட்டு அவரை அடிக்கவில்லை என்றும், இடையில் தடுக்க முயன்றபோதுதான் எதிர்பாராத விதமாகக் கை பட்டுவிட்டதாகவும் அக்ஷிதா விளக்கம் அளித்ததாகக் கூறப்படுகிறது. இருப்பினும், வைரலாகும் காட்சிகளைப் பார்த்த ரசிகர்கள் சிலர், அக்ஷிதாவின் செயல் தற்செயலாக நடந்ததுபோல் தெரியவில்லை என விமர்சித்து வருகின்றனர்.

35

இதேபோல், மற்றொரு சம்பவத்திலும் வாசன் - அக்ஷிதா இடையே கடுமையான வாக்குவாதம் ஏற்பட்டுள்ளது. வாசன் ஓர் இடத்திலிருந்து வெளியேற முயன்றபோது, அக்ஷிதா அவருக்கு வழிவிடாமல் எதிரே நின்றதாகக் கூறப்படுகிறது. இதனால் தன்னைச் செல்ல அனுமதிக்குமாறு வாசன் கேட்டுள்ளார். ஆனால், அக்ஷிதா தொடர்ந்து அங்கேயே நின்றதால், அவரை விலகிச் செல்லுமாறு கூறிய வாசன், தோள்பட்டை பகுதியில் தள்ளியதாகத் தெரிகிறது.

இதனால் ஆத்திரமடைந்த அக்ஷிதா, தன்னை எப்படி தள்ளலாம் என வாசனிடம் கேள்வி எழுப்பியுள்ளார். இதையடுத்து இருவருக்கும் இடையிலான வாக்குவாதம் மேலும் தீவிரமடைந்துள்ளது. இந்தச் சம்பவம் தொடர்பாக இணையத்தில் பல்வேறு கருத்துகள் பகிரப்பட்டு வருகின்றன. குறிப்பாக, வாசன் வெளியேற முயன்றபோது அவருக்கு வழிவிடாமல் நின்றது ஏன் என அக்ஷிதாவை நோக்கி சில நெட்டிசன்கள் கேள்வி எழுப்பியுள்ளனர். அதே நேரத்தில், எந்தச் சூழலிலும் சக போட்டியாளரை உடல் ரீதியாகத் தள்ளுவது சரியானதா என்ற விவாதமும் எழுந்துள்ளது.

அக்ஷிதாவுக்கு ஆதரவாகக் களமிறங்கிய கரிஷ்மா!

இந்த விவகாரத்தில் அக்ஷிதாவுக்கு ஆதரவாக கரிஷ்மாவும் பேசியதாகக் கூறப்படுகிறது. வாசனின் செயலுக்கு எதிர்ப்பு தெரிவித்து அவரும் வாக்குவாதத்தில் ஈடுபட்டதாகப் பரவும் தகவல்கள் ரசிகர்கள் மத்தியில் பேசுபொருளாகியுள்ளன. ஏற்கெனவே பிக் பாஸ் வீட்டில் வாசனுக்குக் கிடைக்கும் வரவேற்பு தொடர்பாகப் போட்டியாளர்கள் சிலர் பேசியிருந்ததாகக் கூறப்படும் நிலையில், தற்போது ஏற்பட்டுள்ள இந்த மோதலையும் அதனுடன் தொடர்புபடுத்தி ரசிகர்கள் விவாதித்து வருகின்றனர்.

குறிப்பாக, வார இறுதி எபிசோட்களில் வாசனுக்குக் கிடைக்கும் கைதட்டல்களும் ரசிகர்களின் ஆதரவும்தான் மற்ற போட்டியாளர்களுக்கு அவர் மீது அதிருப்தி ஏற்படக் காரணம் என வாசனின் ஆதரவாளர்கள் சிலர் கருத்து பதிவிட்டு வருகின்றனர். இதனால் அக்ஷிதாவுக்கு ஆதரவாகப் பேசிய கரிஷ்மாவையும் சமூக வலைதளங்களில் சிலர் விமர்சித்து வருகின்றனர். இருப்பினும், போட்டியாளர்களின் உண்மையான நோக்கம் என்ன என்பது நிகழ்ச்சியின் முழுமையான காட்சிகள் மூலமே தெரியவரும்.

45

பிக் பாஸ் வீட்டில் நடந்த சம்பவங்கள் குறித்த மாறுபட்ட விளக்கங்கள் இணையத்தில் பரவிவரும் நிலையில், இந்த வார இறுதி எபிசோடில் தொகுப்பாளர் விஜய் சேதுபதி இந்த விவகாரத்தை விசாரிப்பாரா என்ற எதிர்பார்ப்பு அதிகரித்துள்ளது. குறிப்பாக, அக்ஷிதாவின் கை வாசன் மீது பட்ட சம்பவம் மற்றும் வாசன் வெளியேற முயன்றபோது ஏற்பட்ட தள்ளுமுள்ளு ஆகிய இரண்டு நிகழ்வுகளின் முழுமையான காட்சிகளையும் குறும்படமாக ஒளிபரப்ப வேண்டும் என ரசிகர்கள் சிலர் கோரிக்கை விடுத்து வருகின்றனர். இதனால் இந்த வார சனிக்கிழமை எபிசோடில் இரண்டு குறும்படங்கள் இடம்பெற வாய்ப்புள்ளதாகவும் ரசிகர்கள் மத்தியில் பேசப்படுகிறது. ஆனால், இதுகுறித்து அதிகாரப்பூர்வமான தகவல் எதுவும் வெளியாகவில்லை.

TTF வாசனுக்கு ரெட் கார்டு கொடுக்கப்படுமா?

தற்போது ரசிகர்கள் மத்தியில் அதிகம் விவாதிக்கப்படும் மற்றொரு விஷயம் வாசனுக்கு ரெட் கார்டு வழங்கப்படுமா என்பதுதான். அக்ஷிதாவை வாசன் தள்ளியதாகக் கூறப்படும் சம்பவத்தை முன்வைத்து, அவர் மீது நடவடிக்கை எடுக்கப்படுமா என்ற கேள்வி எழுந்துள்ளது. அதேபோல், இந்த மோதலில் இரு தரப்பினரின் செயல்பாடுகளும் முழுமையாக ஆய்வு செய்யப்பட வேண்டும் எனவும் சிலர் வலியுறுத்துகின்றனர். வாசனுக்கு எதிராக இந்த விவகாரம் ஒருதலைப்பட்சமாகப் பயன்படுத்தப்படக்கூடாது என்பது அவரது ரசிகர்களின் கருத்தாக உள்ளது.

55

பிக் பாஸ் வீட்டில் அடுத்தடுத்து உருவாகிவரும் மோதல்களுக்கு மத்தியில், இந்த வார இறுதி எபிசோட் மீதான எதிர்பார்ப்பு அதிகரித்துள்ளது. வாசன் - அக்ஷிதா இடையிலான பிரச்சனைக்கு விஜய் சேதுபதி என்ன விளக்கம் அளிக்கப்போகிறார்? இருவரின் செயல்பாடுகள் குறித்தும் கேள்வி எழுப்புவாரா? சம்பவத்தின் முழுமையான காட்சிகள் குறும்படமாக வெளியிடப்படுமா? என்பது ரசிகர்களின் முக்கிய எதிர்பார்ப்பாக உள்ளது.

இந்த வாரம் அனைத்து போட்டியாளர்களும் நாமினேட் ஆகி இருந்தனர். அவர்களில் அக்‌ஷிதாவை எப்படியாவது வெளியேற்ற வேண்டும் என முடிவெடுத்து, அவரைத் தவிர்த்து மற்ற போட்டியாளர்களுக்கு வாக்குகளை அள்ளி வீசி வந்தனர் டிடிஎஃப் ரசிகர்கள். அப்படி இருந்து அக்‌ஷிதா தப்பி இருக்கிறார். இந்த வாரம் மிகவும் கம்மியான வாக்கு வாங்கியிருப்பது முகேஷ் தான். அவர் தான் இந்த வாரம் எலிமினேட் ஆவார் என தகவல்கள் தெரிவிக்கின்றன.